自從上次講完利率後，其本上都冇乜新野要講，因為真係大局已定，冇新既淡方論點，再交流都冇乜野學。不過見到有新博客入場，又去完外國有D新觀察，希望可以有D理性討論。
早輪去外國收樓順便視察下，週未當然都會去睇下人地open house, 基本上係要排隊入去睇（係得45分鐘時間開放），條隊多數係亞洲人（大陸人為主，另外有D星加坡口音）。大陸經濟唔好，反而令更多錢流出外國，而家美英澳紐加既樓市都係一片繁榮。美國EB5投資移民visa最近仲爆左quota要等下個財政年度先有，之前幾年都冇咁快用完（其實呢個只係兩年既Visa，之後要加碼投資）。
咁香港呢？其實當大陸客都適應3D，一手樓既溢價又會返來，而家地產商又投返地可能都係因為咁，到時就更加冇得跌。
咁大陸轉勢又會令香港，甚至世界PK嗎？就目前所見，以大陸行政能力，2020年人口日本化前要保住基本既穩定唔係問題（係媒體開放綁手綁腳既香港，佔中都比佢攪到潰不成軍，大陸連google都上唔到就更加唔係問題），到2020後就算經濟差人口都己經老到亂唔出樣。
只要係大陸係慢慢地走下坡，錢慢慢流出，咁世界其他發達地方既經濟都唔會有大問題，而香港既情況可能會有D似民國到日本侵華時期既租界咁，唔可以話好先進好有法治，但只要比中國其他地方好（即使香港變差），人同錢已經不斷流入（實質上係避風港），當時幾個租界每年都有高速增長直至日本全面侵華。而家好多人話大陸好香港好，但歷史上都有唔少例子係大陸好香港差（97-03，因為輸出通縮），更多係大陸差而香港冇差甚至好左，香港一直都係一個避風港。
睇返而家中俄美角力，結果唔單只冇令香港有錢外流，反而係有錢流入，情況令我諗起二戰時，無論猶太人同希特拉都放錢入瑞士，結果瑞士就兩面既錢都食哂（除左好彩死唔去果班），戰後成為世上人均最有錢既國家。老實講，如果普京一個唔覺意比人XX左，果D錢可能會一直留係香港.....
其實對於歐美來，丹麥都係一個避風港，2012年仲要出到負利趕錢走，但克朗都照升3成，不過樓就跌D，我search唔到有關既分析，可能係因為本身有租管同冇乜外來人口所以錢只係泊係貨幣度。
對中國富豪來講，澳紐加又係有避風港既作用，金融海嘯後人人以為PK，澳紐樓市都似香港咁短暫插一下(可以用noise去形用，市場本質係外圍出事其實對呢D市場有利），之後就因為資金流入而大升，到而家美國好返D話資金回流都冇任何跌既跡象。所以要睇大陸走下坡對外圍影響，唔可以只睇大陸內部，更重要係同時睇大陸外內既走勢既相關性。由2013年中到而家，中外經濟股樓都可以確定一個明顯背馳既趨勢，要改變呢個背馳，可能要等一D重大既改變，以大陸來講，主要係政策改變，打貪同放水都唔係，因上年已經係咁，反而好似背馳走勢既原因。
要斷估的話，可能令呢個勢逆轉既，就係大陸加息去以做震盪治療（係大陸放數既張化橋成日叫政府咁做，但唔好話政府，連財演界都冇人理佢，但我估佢作為放數佬接觸面會比大部份人多）；習總而家要慢慢打貪（王岐山：以後你就慢慢懂），以中國官員數字計可能要打幾年，有排都唔可以開多條戰線，而且有呢個主張既李克強都靠邊站，可能性就更加低。我仍然睇大陸只會慢慢走下坡而唔會有重大問題，甚至會有幾個大反彈，因為可以freeride美國既科技創新（雙馬同近期既雷軍都係high-tech freeriders, 為中國創造巨大財富），俄國既反美自保亦令中國多左個中間人角色。
加息問題都可以保充小小，而家中歐美都冇通脹壓力，歐洲甚至係通縮，歐元走低令美國唔加息都吸引到人買債（最多蝕息賺匯），而中國放水可能有通脹壓力，但又可以調節物價係通脹比例出個好D既數字令人民好過D，加上中共係以面子維持既政府，唔會比差既數字出玩，多數都會靜靜地放水去保一線樓市，連理財產違約影響咁多人都可以拆掂，樓市呢D可以case by case咁估價就更加唔係問題。
