TO 1 亮劍前輩

我覺得呢位業主係全香港咁多位受害業主既其中一位.點解業主要被懲罰??

細價樓因需求大成交價很高！！

唔知幾時係〝組合細樓換大樓〞自用的好時機呢？？

巴士的點評——唔好搞到樓價升

立法會愈玩愈大，前日人民力量陳志全叫點人頭成功製造休會，昨日黃毓民用杯掟特首。

七一之後街頭未出亂事，但議會內已經反轉。在立法會放暑假前餘下的日子，好可能在泛民拉布中度過。

 政治風起雲湧，但仍然有唔少小市民唔係點理時事，只係關心樓價。我認識一對三十來歲的夫婦，三四年前沽了五百幾呎的自住樓，收番三百五十萬，一心想等樓價跌，買番個大DD既單位，結果當然不能如願，樓價愈望愈升，他們出外租屋租金係咁加，過兩年租約滿又要搬。

這一陣子樓市又來一個小陽春，小兩口子沽左的單位，現價都升到五百萬，當然睇到都眼冤。

老婆怪老公「麻鬼煩，做乜沽自住樓等樓價跌」，老公又怨老婆「你當日夠話好，你都無阻住我沽樓啦」，總之搞到家嘈屋閉。

老公等左兩年買唔到樓，又俾老婆哦，開始按捺不住，話如果樓價再升，佢地被迫都要買番間，「否則呢一世都買唔到樓」。

雖然我覺得好難講到「呢一世」咁死，但人地搞到出現家庭問題啦，外人都唔好咁多意見，唔係搞到人離婚，唯我是問。
另一個朋友的處境不同，佢係高級公務員，行將退休，個仔做左幾年野，想明年結婚，現在等老竇同佢出首期買樓，呢一兩個月一邊睇，樓價又反彈向上，愈愈心急，因為阿仔最遲都想今年內買到，裝修幾個月，然後結婚入伙。

現在市區樓中小型單位郁D都六七百萬，老竇畀三成首期加手續費裝修費，當六百五十萬一間樓，個仔都要供近四百五十五萬，以二點二五厘息，供二十五年計，現在咁低息都要供兩萬一個月，係朋友個仔同未來太太收入的一半以上，老竇出雞、個仔出豉油，都唔係咁易頂。

我問朋友如果加息，阿仔點算？朋友有點沮喪，話「個仔結婚唔通同我兩老一齊住咩？唯有希望個市唔好再升，等佢地買樓唔好咁貴啦！」

 呢班等住買樓一族，現在都幾慘。因為本年度立法會只剩下幾日會期，但包括「樓市辣招」等多項草案都尚未通過，政府爭取在本月十五日晚即係本屆會期最後一晚通過「辣招」草案，但睇落都有D危，唔知道過唔過得到，若過唔到市場又會收到「辣招無效」的訊息，樓價好可能會再升一浸。

唔好怪我唔信D政客，因為打到九彩之後，邊個得益呢？

若然立法會過唔到辣招法案，樓價再急升，迫到更多市民搶住入市，發展商大舉散貨，市民接晒貴貨，條數又點計呢？

市民若因此而買樓買貴一二百萬，真係做多十年都頂唔到條數，最後都唔知問邊個追討。

「巴士的報」是一份網上報紙，讓網民隨時隨地拿手機或平板電腦可以看到。www.bastillepost.com

        wh.lo@bastillepost.com

        盧永雄

總之搞到家嘈屋閉 -> 乃是自作自受, 求仁得仁, 正苦有勸大家勿沉迷賭博, 勿病態賭博, 乃至隨便賭身家

現在等老竇同佢出首期買樓，因為阿仔最遲都想今年內買到 -> 兒孫自有兒孫福, 莫為兒孫做馬牛

依家千五蚊市區只可租到重慶大廈果d質素既貨. 樓上有時間既話, 可以上去睇睇.

十幾年後, 大家估下千五蚊仲可唔可以係香港搵到酒店房牙拿.

引刀一快-----2013-04-12 我係咁講：『昨天政府公佈，香港樓宇整體空置率係 4.3 %，而豪宅係 1O.7%，有啲評論員就話，千呎以上豪宅空置率好嚴重，政府要做嘢，我真係要妖那媽！

點解豪宅空置率會咁高呢?

首先當然要捉梁粉頭馬陳某出來執一劑啦，香港整體豪宅九仟多個單位空置，佢老哥隨時喺西九嗰兩個盤就包你一成！

第二就係打上十年，地皮供應極度短缺，咁每間地產商手上只得嗰拾塊八塊土儲，唔將佢整靚包花紙，以提高均呎價，當曬豪宅賣，咁跟佢哋搵食嘅人食西北風咩?

豪宅裝修要符合高尚品味，要貼合個人喜好，而裝修材料隨時要歐洲定，所謂慢工出細貨，在在影響裝修期！

政府呢幾年狂抽高價樓水，加政策、加稅、加按揭成數，務求令有錢人入唔倒市，中上收入嘅人換唔倒樓！

跟著就話豪宅空置多，唔該CY張開眼睇清楚，現在唔係無人買豪宅，係你唔俾人買、唔俾人換咋！

政府仲話有啲豪宅落入大陸客手上，佢哋唔租唔賣，所以統計署就當曬人哋空置，咁樣簡直係屈得就屈，首先唔該那些人答我幾條問題：——

〉請問每日到港遊客，比對全港酒店賓館落差係多少?

〉請問一個有商務需要嘅大陸生意人，若要來港傾生意，可否隔日就定倒酒店房?

〉請問如果一個大陸富裕家族有喜慶事攪，要齊齊來港渡假，你政府可擔保倒人家，能夠定到足夠嘅酒店房嗎?

〉在港有生意嘅大陸商人，如要招呼伙伴客戶，使唔使搵地方款待人家?

〉去完廣東道入貨，唔通可以將那些名牌手袋鐘錶四圍放在酒店房嗎?唔見咗揾阿水來負責?

咁唔買定一間港樓做定後備，那有起事來，唔通叫人哋瞓公園or天橋底嗎? 』

1000萬嘅爛鬼cheap豪宅要俾150萬BSD千五蚊嘅酒店可以瞓一千晚，如果一年住兩個月，夠住17年

You forget one most important factor : living in Hotel is expense, money gone to the sea forever.  

Buy a lux property is investment, it could rise up or fall down, but it can still be sold for a price, it won't be zero.

拆解細價樓癲價潮

特首梁振英昨天在立法會答問大會上表示，他推出的「雙辣招」穩定樓市措施「已初見成效」。筆者不知他如何界定「成效」，但事實是，最關乎民生的「上 車盤」細價樓近日出現「癲價反彈」，多個上車屋苑樓價接連破頂創新高，升勢比出招前更凌厲。由此看來，細價樓似已對辣招產生「抗體」。

箇中原因，一方面由於供應減少，既因業主持貨能力強，無必要割價拋貨變現，同時受到辣招限制，他們擔心一旦沽出單位後不易買回，於是更加惜售，令盤源愈縮愈少。

樓價不跌 收入升毅然入市

可是，筆者認為，對細價樓來說，更重要的因素在於需求方面，皆因近三、四年本港經濟持續向好，無論市民收入或財富積累都蒸蒸日上；尤其是基層市民及「上車客」小家庭，受惠於最低工資及就業市場興旺，近幾年無疑處於好景。

例 如房委會日前宣布公屋加租10%，理據是2011至2013年這兩年間，公屋住戶家庭收入大增了19.27%，這是非常可觀的增幅。當然，其中最低工資發 揮一定作用，因公屋住戶多屬基層人士，是最受惠於最低工資的一群；同期其他階層人士的收入增幅未必會有這麼高，但某程度也反映本港市民收入增加的大趨勢。

據統計處調查，本港整體名義工資指數在2010至2013年的3年間，分別上升9.4%、5.1%及4.1%，累計升幅19.7%，跟公屋家庭收入的升勢相當一致。

筆 者很了解「上車客」心情，身邊也有不少信錯梁振英（及曾蔭權）的「唔好彩個案」。他們在兩三年前本來已勉強夠錢付首期上車，不過見到曾蔭權及梁振英先後出 招，以為樓價真的會回落，就算不大跌，跌一兩成也好。但自從曾蔭權於2010年11月推出SSD（額外印花稅）以來，細價單位價錢只曾經略為偏軟，便再繼 續拾級而上。

筆者有些朋友近年飽受女友、老婆及外母埋怨：「三年前已經叫你買樓，你又話信政府，以為樓價實跌，而家？升咗四成啦！當初又唔 聽我講……」不斷炮轟之下，就算是堅貞的曾粉或梁粉亦難免動搖，不再相信樓價真的會回落；再加上他們近年收入及財富都上升，三年前原本買得起280萬元的 樓，今天已可負擔320萬元，於是毅然上車，造就細價樓「癲價破頂」。

平情而論，曾蔭權及梁振英的「3D辣招」，對於打壓炒家及外來投資者 無疑很奏效，但主要見效於豪宅及中大型單位；相反，對於細價樓則只是在3年間壓抑了上車客的「剛需」，現在谷谷埋埋一次過爆發出來。換言之，近日的「細價 樓癲價潮」是由積壓了3年的購買力開始爆發而造成，未必可以持久。

最重要的是，自由行效應已經見頂，本港經濟及就業市道很難延續近幾年的好景；而且加息勢在必行，上車客現在「計掂數」覺得買得起、供得起的樓，兩三年後或許是另一回事。從來在一個樓市升浪的尾部，壯烈犧牲的都是「心急上車客」。

長和系主席李嘉誠對樓市有兩句永恒金句，上句「自住幾時都可以買樓」，下句「只要自己負擔得起」；在今2月的業績會上，他為下句作出了一點補充，負擔得起的意思是可以繳付樓價的50%作為首期，這點值得目前的心急上車客深思。

tyko@hkej.com

放大圖片

請問假如辣招未能在本屆會期通過, 是否會被作廢? 還是只是延至下屆會期作表決?

-------除非立法會加時,否則下屆再接再厲!

若只是延遲表決, 為何市場又會收到「辣招無效」的訊息?
請看下列文章。

財團或延賣樓 

倘未如期加印花稅 

樓價恐升3成

特首梁振英表示，立法會因為拉布造成嚴重塞車，若下周三提交立法會審議的雙倍印花稅法案，未能如期通過，炒家投資者或活躍起來，亦不排除地產商會拖慢賣樓計劃。 

其實 CY 已預知楼市將會爆边，現在報定案同搵定替死鬼！

到港唔一定過夜，過夜唔一定賓館，你想表達邊様？

當然係過夜計啦。

定唔到房就冇得落脚嘅大陸人，可以不理！唔會係可以一炮俾百幾萬BSD嘅人。

我識幾個手持商務簽證既強國生意人，都有定酒店的煩惱，有人就此買件私樓脫苦海!

亮劍兄，人家咁多人，一間屋夠住？人家成日大龍鳳要自置物業搞喜慶？呢樣牽强咗D。

千零個一間有可能係三房。

依傢招呼伙伴客戶唔興喺自主樓，因爲唔想俾人睇得咁透，招呼朋友又唔同，呢家嘢我又識少少喔。

他們買既樓，定必有豪華會所，而呢D 會所十之八九只限業主入會。

酒店有夾萬服務挂？為幾件貨買屋嚟防盜？又係好似牽強咗D。

落得來香港單單買幾件野嗎?

有喜事唔識安排鄉親住宿，有起事冇屋就要瞓街，呢類人邊有錢邊會隔山買牛吖，亮劍大哥，咪玩喇。

物以類聚，同有米玩開既親朋好友會係窮人嗎? 幾年前你知唔知強國一組客，買新樓就如買西餅，係半打, 一圈咁掃呀!

依傢豪宅買唔到香港戶口。

買完指定基金再買樓唔俾?

依傢D錢落香港，又冇出國咁保險。

買完香港樓再買第二個國家既樓係咪唔得先?

Half of a 德寶 　：）

到港唔一定過夜，過夜唔一定賓館，你想表達邊様？

當然係過夜計啦。

過夜就要買樓？唔係挂！！？？

定唔到房就冇得落脚嘅大陸人，可以不理！唔會係可以一炮俾百幾萬BSD嘅人。

我識幾個手持商務簽證既強國生意人，都有定酒店的煩惱，有人就此買件私樓脫苦海!

咁我問你，你覺得幾多個有“定酒店的煩惱”嘅強國人，會攞咁多錢岀嚟解决問題？要解决定酒店問題係咪一定要買樓？我假設你所講呢位兄台經常需要落香港公幹，我提一個方案：

1150萬，大陸5年定期約五厘，假設15年維持不變，單息係每年57萬五千，夠租五萬蚊個月嘅樓喇挂？長租咪唔駛煩囉。

亮劍兄，人家咁多人，一間屋夠住？人家成日大龍鳳要自置物業搞喜慶？呢樣牽强咗D。

千零個一間有可能係三房。

唔好玩喇，三間房仔你用嚟照顧鄉里鄉親？

你原問題係“〉請問如果一個大陸富裕家族有喜慶事攪，要齊齊來港渡假，你政府可擔保倒人家，能夠定到足夠嘅酒店房嗎?”

咁嘅情况，我覺得個個都係會安排酒店解决，100個都唔會有一個例外。

依傢招呼伙伴客戶唔興喺自主樓，因爲唔想俾人睇得咁透，招呼朋友又唔同，呢家嘢我又識少少喔。

他們買既樓，定必有豪華會所，而呢D 會所十之八九只限業主入會。

都話唔一定會用自己屋去招呼夥伴客戶，豪華會所又如何？

酒店有夾萬服務挂？為幾件貨買屋嚟防盜？又係好似牽強咗D。

落得來香港單單買幾件野嗎?

香港近年出過幾多單酒店失竊吖，買D嘢驚成咁就邊度都唔駛去喇。

有喜事唔識安排鄉親住宿，有起事冇屋就要瞓街，呢類人邊有錢邊會隔山買牛吖，亮劍大哥，咪玩喇。

物以類聚，同有米玩開既親朋好友會係窮人嗎? 幾年前你知唔知強國一組客，買新樓就如買西餅，係半打, 一圈咁掃呀!

呢樣我又知道喔，咪就係呢D人有份炒高香港樓市囉。買嘅目的就係投資、利用、攀比，因爲佢地錢來得容易夾離奇，又離奇地容易，言歸正傳，佢地唔係為解决訂酒店麻煩而買香港樓，酒店嘅總統套房係幾時都唔會爆滿嘅。

依傢豪宅買唔到香港戶口。

買完指定基金再買樓唔俾?

俾，不過討論嘅係有冇必要，係冇。

依傢D錢落香港，又冇出國咁保險。

買完香港樓再買第二個國家既樓係咪唔得先?

買邊個先都得，不過討論嘅係有冇必要，係冇。

你提供的兩個答案都不是，佢都未得閒處理佢手上啲物業，佢在國內最少仲有兩間屋仔掉空，一間在養羊，一間裝修好，後者每週有工人去搞衛生，睇吓啲花花草草。

你世伯件兩房係留喺香港嘅根，同大陸人買港樓意義上大相徑庭--------

首先呢個係我老婆既世伯先真。

其次將軍澳呢件野，係佢幾年前先買的，一手入絕冇租過俾人住，而他在港仲有舖同有私樓出租用以養老。

點解我會寫上面 D 野?就係我老婆問佢世伯點解唔將層新樓出租收翻筆，他的答案正正就係農曆新年香港好難定酒店！

其實如果你設身處地來想，當你都好似果位世伯咁有米，每個月單單收租，都可收到拾幾二十萬，咁兄台都會好似呢位世伯咁做，會用金錢來買個方便。

TO Oscar Lam 兄

以今日樓價只係CCL峰值低幾個巴仙計，無論幾時賣樓都只係得好少人有得賺幾個巴仙，因為連埋赚嘅錢都再買唔番同一個單位，所以應該係100個賣咗樓，最少97個實際上蝕咗。

TO 55 引刀一快兄

買唔番同一個單位，係今日啫，唔係以後嘛，唔買住囉。

樓價長遠必升，理論上愈遲買，買唔番嘅機會就愈大，所以唔買住等跌，得要準確把握短期波幅低位入市，買入後長揸勝面必高；如果所謂長揸嘅年期超過三十年，則據歷史觀察，任何時間買入都必賺，所以愈年青時愈勇置物業，而又持有不賣者，到目前為止嚟睇，全部發過豬頭炳，就算到2050年都好大機會靈驗，除非通漲由今日起消失。

TO 60 Oscar Lam 兄

懶人話之前賣咗樓嘅100人之中，約有97人實際上蝕咗，係用幼稚婆乸數，街市做生意計，賣咗再買番同樣貨量有無得賺。

但若以投資角度係，賣岀價出過買入價就係賺咗，並無須要再買番同一樣貨量嚟講，近來十個賣樓有九個賺，係100%正確無誤。

TO 66 珍惜香港兄

兄台對於自住物業睇法係屬於瀟灑一族，覺得自住樓好似係心頭好嚟看待，無須理會佢昨日、今日、明日價值幾多，總之負擔得起就心安理得，人到咗呢個境地可以講係好寫意，懶人今日雖然不富有但都明白兼体會到。

但係今時香港一個住宅單位，可以用價值不菲嚟形容，要做得到咁瀟灑，真係要有一定財力同心理質素至有條件，呢啲階層嘅人唔少，但係無咁好能力者而又想去擁有一間自住樓嘅人，佢地嘅心態可能係截然不同，尤其是首期係借來嘅，要還又要供嘅，樓價升跌一定係好在意同惶惶然，懶人因為後生時同细佬夾份供一層樓就係咁環境，好深刻嘅体會，供完樓月尾幾日要借錢開飯頭嗰一年，一世記得，如果當時計過負担得起至買而唔去慳去搏，捱過咗嗰個難關儲存咗基本實力，好可能今日一個單位都未能擁有。

無足夠能力去搏可能得，可能失，唔去搏係咪就可以一生安穩？97年去搏同03年去搏，成敗天淵之别，人生際遇無常難料，懶人只一生拼博，從來抱謀事在人，成事由天心態，逆境時捱係視作當然，顺境時就會穩守加進取，性格到今日都無变。

TO 68 Oscar Lam兄

兄台與珍惜香港兄都是有學問，有見識，聰明而充滿正能量的人，是前生修的福；懶人小時不懂學問好，苦頭嚐得夠，人倒學會開心過一天，不開心又過一天，只要今天挺得過，明天會更好，轉眼幾十年，原來真的今日比昨天好，但願與兄台、珍惜香港兄共勉之。

TO 70 引刀一快兄，早上好。

引兄對意見交流好認真，即表示尊重對方，同時兄台對內地非常了解留意，亦樂意於分享，論點有前瞻性、啟發性，係懶人覺得尊敬嘅地方。

引兄第一點提到：香港將來嘅人口密度，可能因開發更多地而不升反跌、同時內地好容易覓地替代、或足以與香港競争嘅理想地區；第二點提到：香港將來與國內嘅交通將更高速、方便、四通八達，可能會將香港現時優勢分流，對國家嘅重要性、唯一性降低，從而影响咗香港將來嘅地位；第三點提到：香港將來2047年一國两制極限日到來，所有地契都可能發生業權重新處理危機，擔心將來物業價值。

懶人覺得引兄提岀呢三點，隱含對香港前景擔憂，或岀於現時香港乱局引發或加深，應係人之常情，但呢三點存在不確定性，同時係两刃刀，一就係就令香港從此步於末落，一就係就令香港以後更加重要，結果如何就正如引兄所言，端視亞爺對香港嘅定性同長遠策略。

懶人試以亞爺嘅角度去諗，香港單就百年來喺全球嘅名氣、成就、獨特性而言，等若國家一項光芒四射嘅名牌，應該無咁容易再創造、被取代或被放棄，香港在政治、地理、民生、經濟各方面都緊緊掌控於國家，任何乱局不容易生根，况且今日國家政治手腕及人才、經濟實力、國富兵强、談判籌碼己不同於往日，處理香港問題絕不會鐵餅一塊，觀乎之前23條立法係國家之重，亦以審時度勢態度容緩变通處理；至於特首無能禍港不會持久，且看董建華政經失誤下場，CY愈行愈近矣。

懶人深信，香港未來幾十年仍對國家有重要政治、經濟、對外缓衝、對外試探、對外宣傳、對外溝通價值，在國內政治大改革前，其作用洽如政治防火牆，國家不會輕易放棄香港咁不智，引兄最擔心嘅事將來可能係對香港最有利嘅事。

至於對物業睇法同投資處理，如何對應香港前景，引兄大智大慧，必然暸然腦中，無用懶人多言了。

TO 珍惜香港兄、引刀一快兄、Oscar Lam兄、順民兄、亮劍兄、各位網友。

各位兄台晚上好，懶人人生經驗中，看着年齡相若的人，今日有名或有利，表面得體風光，其實只有少數人生來就一帆風順，多數人都經歷過多次驚濤駭浪、辛酸歷鍊而得來，挺過的許多酸甜苦辣衝擊，難以一一為外人道，超人李嘉誠先生係箇中表表者，係懶人偶像，縱然再十世亦難望其背項。

珍惜香港兄稍稍提及過往其中一段官司經歷，懶人己可体會其中苦況，承受壓力之大、精神負担之重、經濟困境、情绪困擾日以繼夜地折磨着，確是苦不堪言，佩服珍惜香港兄堅毅不拔、決不卸責、誓不低頭勇氣；懶人亦試過打官司收租霸樓，不過其艱難處相對而言係小巫見大巫了。

慨嘆人生充满淚水與歡笑、嘗試過失敗然後成功、捱過失去苦痛之後再欣然得著，說生命多姿多采，想必如此。