| 瀏覽人次 : 49656
回應 : 121
|
港燦式茶餐廳(一)唔係嘛？買大陸屋？
引刀一快
2015年12月9日
引刀長居廣州，乃正牌港燦，爲何有香港這塊世界級風水寶地唔好好享用，走去大陸攞苦嚟辛？仲失咗香港09年以後嘅地産大升市，真係港燦中嘅傻港燦！其實廿多年嘅大陸經歷，有苦有樂，有失.........亦有得！請容引刀娓娓道來。
話說廿多年前，引刀喺香港A level考試成績差到痹，當時好多同學重讀、或者考TOEFL出國，引刀家裏經濟真係嘛嘛地，唔捨得年邁雙親之餘，亦唔想為學業耗盡父母積蓄，因爲人家出國可能係因爲叻仔，引刀自己知自己事，出國係因為自己唔夠勤學，完全係自己衰，冇嗱嗱聲搵工養家已經好唔生性，實在唔應該駛屋企咁多錢。有日忽發奇想，不如試下“廉價出國”，返大陸讀書！反正引刀再考A level都唔慌好得去邊，即刻搵資料，原來，當年香港人提起大陸大學都會諗到嘅暨大（暨南大學），同泉州嘅華僑大學，兩間都係僑校，係面對港澳臺僑生爲主嘅，報名同考試都同大陸其它大學嘅聯招分開，引刀讀書咁屎，當然大包圍，僑校同聯招兩邊都報，當時嘅同學，一班難兄難弟學渣，聽見引刀想返大陸讀書，都以爲引刀燒壞腦，我提議佢地一齊試下，個個耍手擰頭，話香港唔承認學歷，白讀！而且覺得大陸好落後，去玩下就好，長住咪搞，而我就計計數讀完香港都回歸喇，可能有用呢！
其實引刀呢個决定都係諗住大包圍啫，香港課程課本都係英文，準備大陸考試全部中文，所有teams要學過晒，仲要去適應中文試題、同埋大陸考試模式，最慘就係，引刀最剎食嘅practical試，當時大陸欠奉，少咗得分環節，所以把握唔見得比A level高。不過，因爲對港澳同胞嘅照顧和諒解，試題會適度降低難度，但係講明英文科試卷就要比國內生所考嘅難啲啲。
考試結果，重考嘅A level陪難兄難弟們全軍覆沒，而大陸兩個考試都錄取咗，唔好以爲大陸嘅考試水準會低過香港，有時人嘅潛力，就係要換個環境至可以發揮，引刀都係命焦，如果細細個就返大陸讀書，咁就唔駛成日俾阿爸阿媽打喇..............！
因爲1989年發生嘅事情，往後所有高校都要新生軍訓一個月，本來港澳生免役，但係我唔想俾人覺得香港人嬌生慣養，我不但隨團軍訓，而且放棄入住留學生樓，同大陸學生一齊住十人宿舍，一張碌架牀放咗書櫃仔同其它“家當”，活動空間就剩低上半身90公分、下半身50公分寬度，加上完全不能敞開蚊帳瞓覺，所以如果今日引刀不幸要住籠屋的話，都可以頂得住。
講到呢度，大家會問，同大陸樓有咩關係呀？講古佬呃飯食就梗係慢慢講兼賣關子喇，做做自我介紹先，欲知且看下回分解！
|
|
|
|
|
|
|
|
|
|
| 1. I am nobody2015-12-09 07:28:01 |
|
沙發 |
| 2. 歷史長河2015-12-09 08:00:43 |
|
恭喜弓力兄出文，原來真是農務系。等待續集。 |
| 3. Jerry2015-12-09 08:12:27 |
|
恭喜刀兄出文，小弟窮二代既朋友富二代也是讀這間大學。當時他爸叫他去外國, 他說:「我都唔識英文」哈哈
|
| 4. 引刀一快2015-12-09 08:15:47 |
|
|
| 5. 引刀一快2015-12-09 08:18:38 |
|
出國唔駛識英文架，出到去兩個月就個個都lock lock聲喇，生活係有壓力去加速學習嘅。 |
| 6. 打工仔 Andy2015-12-09 08:21:36 |
|
|
| 7. 引刀一快2015-12-09 08:22:15 |
|
|
| 8. 魚蛋仔2015-12-09 08:33:22 |
|
恭喜引刀兄出文！ 睇引刀兄所述的時間，可能我們的年紀相差不遠。哈哈！ 引刀兄可以去國內留學已經不錯了。我中學會考後，媽媽跟我說:爸爸要退休了，你要工作養家。我最後是讀夜校考A level的。成績當然一般啦。 期待你的下文！ |
| 9. 引刀一快2015-12-09 08:44:12 |
|
魚蛋仔姐姐
多謝多謝！讀夜校考A level，妳都好辛苦喎，不過有福依然在，妳如果對中醫藥有興趣，讀完香港嘅部份，可以嚟大陸進修，學術嘅嘢都係拾級而上，過去少得嘅，往後大把機會補番。 |
| 10. 自我陶醉2015-12-09 08:48:48 |
|
嘩! 刀兄流浪記真係耐人尋味! |
| 11. 抱長劍一揚眉，白雲蒼狗何離離2015-12-09 08:50:30 |
|
刀兄的遭遇真係同我有啲似，我亦係考試全部擔梯，HHHHHHHH個隻，走投無路之下把心一橫，走咗去外國洗大餅，結果無論學業同事業都走出咗困境，回首一剎那，幾十年就咁過咗去。。。
|
| 12. 望東樓2015-12-09 08:52:51 |
|
以我所知，祖國大學入學額係玩配額嘅。好似北大有一半學位係留比有北京戶籍嘅學生，而餘額就定額分配全國各省市，比方廣東省有五十個《冧巴老作》等等。所以如果刀叔當年投考北大可能都照入。
聽講祖國啲學霸好勁，考試無敵，SAT可以考滿分。 |
| 13. 引刀一快2015-12-09 08:54:40 |
|
|
| 14. CD ROM2015-12-09 08:57:06 |
|
刀兄，一早竟見到你的大作，嚇一跳~~~ 哈哈。
由十九歲寫起，似乎呢一篇，有排連載了! 大陸係咪一般香港人想像咁樣？要靠你第一身剖白一下喇~
|
| 15. 引刀一快2015-12-09 09:04:01 |
|
PN兄
全對，我當年聽到部份去到清華、北大嘅港澳生，并唔好受，受到白眼，就係因爲呢個原因，話佢地未夠班，人家千軍萬馬過獨木橋，而港澳生就享受優惠。 不過，點入係一回事，企唔企得穩，就要睇表現。 引刀執番身彩，好在冇膽粗到報果邊嘅學校，話時話，我後來有同北大嘅人接觸過，都係有血有肉嘅人啫。 |
| 16. 引刀一快2015-12-09 09:06:44 |
|
CD ROM兄
講到大陸，我相信陸漂如你我者，大家各有遭遇，所以亦各有感受，呢個題目，好豐富！ |
| 17. 望東樓2015-12-09 09:17:46 |
|
我都領教過北大校友個種舍我其誰嘅傲氣。 |
| 18. 占士2015-12-09 09:20:41 |
|
刀兄，終於等到您的大作發表！謝謝分享！非常有故事性！無論多忙都要上來追看呀！哈哈哈 |
| 19. 引刀一快2015-12-09 09:29:14 |
|
To 11樓 抱長劍兄
互勉之！我亦想向香港新一代傳達一個訊息，喺香港考試失敗唔係天崩地冧，只要有韌力，大把路可以行，唔好自暴自弃，亦唔好憤世疾俗，世界總有一日屬于你們的。 |
| 20. 引刀一快2015-12-09 09:33:31 |
|
|
| 21. 引刀一快2015-12-09 09:33:36 |
|
|
| 22. 引刀一快2015-12-09 09:36:21 |
|
To 17樓 PN兄
唷，原來PN兄係北大人！過江龍喎！為港人爭氣！ |
| 23. Sugar2015-12-09 09:57:26 |
|
引刀大大: 估唔到你動作咁快!抵讚!!! 廣州是我喜歡的地方,雖然有好長一段時間她的市容都有點"髒,亂,差"(尤其火車站附近).16歲那年暑假尾我死慳死抵攢了點錢終于進行了人生第一次"遠征"---坐火車去北京!那時來回程都經廣州的.在回程的火車上結識了在廣州華師大諗碩士的于立新.這位高個子大姐姐來自哈爾濱,和我一見如故一路上談天說地不亦樂乎....火車到了廣州我們要話別了.還記得她輕輕地捉住我的手,放進懷裡(現在似乎還感受到那份温暖)...說:小趙,我真不捨得你!....要不,你先不要回香港,來華師大宿舍住兩天好嗎?...就這樣,我打電話回港問準了老爸,就在廣州住了兩星期....華師大工程系碩士班能人異士真太多,讓我這"初生之犢"大開眼界".... 好了,為免喧賓奪主,引刀兄我或者遲些在我的文章中再娓娓道來吧!
|
| 24. 2011年開始2015-12-09 09:59:15 |
|
恭喜引刀兄出文,大部分香港人對大陸的資料來自有既定立埸的傳媒,引刀兄的第一身經歷正好給香港人另一角度看中國. |
| 25. 引刀一快2015-12-09 10:12:09 |
|
Sugar 大大san！
何來喧奪之有！妳的暢情回覆正是為引刀生色貼金呢。
北方人好鐘意改名做“立新”，大陸能人異士確實不少，原來Sugar亦受過北方人嘅情感洗禮，熱切期待妳分享，到時我就冇妳咁客氣，一定會寫好多囬覆。 |
| 26. 新抱仔2015-12-09 10:16:38 |
|
好正呀！我好想睇埋落去，引刀，快d出文啊！好想了解國內與我們的不同，好有興趣呢！
Suger姐
你都好勁呀！那麼小便跑那麼遠，好厲害，好期待你們2位的文章呀！好正！ |
| 27. 引刀一快2015-12-09 10:21:26 |
|
2011年開始女士
我保證會用中肯嘅態度去分析中港之事，當然，所謂中肯，我亦祇是一家之言，但係我廿多年來親身經歷，應該多少有點參攷性。 香港嘅傳媒，有時的確對大陸有偏見，但係有時又會非常準確，甚至，有部份事情，其實大陸係故意借香港傳媒發佈。 |
| 28. 引刀一快2015-12-09 10:22:51 |
|
多謝新抱仔，不過想快得過妳係好難嘅事。 |
| 29. 打工仔 Andy2015-12-09 10:26:21 |
|
糖姐
小弟係80年代都試過坐36小時火車上北京! 有机會我也分享一下。 |
| 30. Sugar2015-12-09 10:30:16 |
|
引刀大大: 本來今日較忙,看了你的文章我不禁擱下雜事先寫幾行. 是的!上次聚會我也和長河兄提及過,我和北方人特別投緣,從來不分彼此的.....我欣賞他們豪邁率性對人熱誠沒壞心眼儿..... 昨天還打算寫租客求愛不遂拒交租被X艶毒辣的收租婆暴力驅逐之破事儿....現在決定改為寫Sugar嶺南舊事---華師大能人異士篇,哈哈! |
| 31. 引刀一快2015-12-09 10:37:12 |
|
華師大廿幾年前有過段黑暗歷史，我記得我剛到廣州時，聽到華師發生大量風化案件，有女生自殺，好憤概。 |
| 32. 向饭民说不2015-12-09 10:43:58 |
|
甘就真系唔明点解引刀兄会甘负能量，讲起楼价，广州的升幅绝对不低于香港，加上以引刀入大学的时间计算，毕业出来工作之后，当时的人仔应该系100元港纸对120人民币。如果投资大陆房地产，肯定发过猪头。还有引刀毕业的时候，应该系大陆楼价第一次泡沫爆破的时期，绝对是买入广州楼的好时机。
入宝山，空手回。引刀兄不要怪政府啦。
不要以为民主国家就好，小弟儿子刚入加拿大大学，证明了一直相信的民主poor guy国家，最终都系牺牲小朋友的教育，而将资源投放在老年人身上，结果是人口老化问题越来越严重。而年轻人越来越不敢生孩子。
加拿大大学不敢加学费，只有想办法家杂费，刚收到学费单，真系水蛇村甘长，有些可以waive的费用，要你自己去申请，你话黑唔黑。宿舍租金达5/6千元港币一个月。
还有大学做埋大二朵，欠交学费，一个月的月息1%以上，年息达12%以上，比信用卡更加金。外国信用卡，有很多年息都系10%。
|
| 33. 新抱仔2015-12-09 10:45:08 |
|
Suger姐，
天呀！你的題材好鬼正！快D寫啦！
打工仔， 坐36小時火車？天呀！昏掉了，太誇張了，難以置信！ |
| 34. 新抱仔2015-12-09 10:46:11 |
|
|
| 35. 向饭民说不2015-12-09 10:48:13 |
|
讲起大陆大学，小弟太太系大陆的fuxking U 毕业，8964时当年她也去卧轨，而她的同届同学有很多人发展非常好，有很多出了国，去了美国，加拿大，澳洲，纽西兰，个个都发展非常好。来香港都系住5星级酒店。
感觉到引刀应该都系入宝山，空手回，在或者系抓到鹿，不懂脱角。 |
| 36. Sugar2015-12-09 10:48:27 |
|
引刀大大: 真的???沒聽立新她們提過....可能大家都想忘記不快事.我們那時晚上十點幾還在偌大的校園徘徊.....不過記得李樺(念心理學)的男友偉良總是陪我們.... |
| 37. 引刀一快2015-12-09 10:54:04 |
|
華師大所在嘅五山，比較偏僻，當年正係民工、盲流大量入穗時期，好多離鄉別井岀嚟打工嘅民工，長期壓抑，當中自然有唔少害群之馬。 |
| 38. 引刀一快2015-12-09 11:29:17 |
|
向飯
好多謝你咁畀面喎，岀嚟嗱？ 首先，你搞錯咗少少時間，我買第一間大陸屋，係幾乎摸頂，總之你講嘅甜蜜爆破係我買咗屋之後年幾兩年嘅事，雖然依傢總價係當年摸頂價四五倍，引刀仍然引以爲戒。 我呢20年遇到啲電視劇式嘅唔如意事，否則我會有幾個寶山，唔係講入与唔入，就係手上有寶山！不過呢D事，我唔想寫。 尊夫人係北大人？撈得好好正常呀，淨係人脈關係網都賦予極大優越性，由軍政界到商界都有人，想乜有乜喇。 不過，有一點最值得我自豪和安慰，我喺呢度遇到另一半，乜都值回票價喇。 向飯，我其實好有韌性，能量氣場是正是負，睇耐啲再評價為好。
|
| 39. law student2015-12-09 11:39:24 |
|
熱烈祝賀刀兄出文, 期待拜讀下集. |
| 40. 引刀一快2015-12-09 11:45:27 |
|
多謝law student兄
我係lout student！ |
| 41. yyfan2015-12-09 11:47:14 |
|
刀兄，如果你真是暨大畢業，應該聽過假洋鬼子之說，小弟其實來自華工，六四後第一批大學畢業生（89屆其實唔算第一批，因為佢地已經畢咗業），有機會同犯民分享下對六四睇法，畢竟我地果代正正係置身這場運動中 |
| 42. 引刀一快2015-12-09 11:53:12 |
|
yyfan兄
原來yyfan兄係華工嘅師兄！係咪89級，93屆？ 我已經喺文中作補充修正，我唔係暨大架，邊間就唔喺度公開喇，費事俾人追斬，廣州嘅港澳生中，輩份係你師弟，我93級。
有機會多多交流！ |
| 43. Sugar2015-12-09 11:55:55 |
|
見到Fan老闆我一定要搭訕(嗚......今日肯定要 OT 了) >.< 你指華南理工大學???好犀利喎! 立新她們帶過我去你學校遊蕩~~~ |
| 44. yyfan2015-12-09 12:06:41 |
|
向饭
其实广州楼价系近十年八年先升得多，之前我93年买入，04年卖出都要亏，而且住宅出租租金奇低，要投资应该买写字楼，我系广州有间写字楼租一万，业主买返来先100万
我个仔系加拿大明年都可能入U,不过又话想参军，好在加纸跌返十年前个价
|
| 45. 我愛中國2015-12-09 12:15:30 |
|
To: 向飯民說不 看你言論，應支持中港融合，為何要送子女向外讀書? 建制弱點係口裹支持，但動作就向西方，包括讀書，旅遊都是 如大人不帶子女認識祖國，下一代只會継續為反而反 |
| 46. yyfan2015-12-09 12:17:37 |
|
刀兄
我系86级，90届，当年第一次参加游行好似是4月反官倒，最后罢课补考搞到果年无心温书，奖学金都拿不到，我地果届毕业分配无人收
我记得曁大唔使军训，我地就要，朝早五点起身操，历时两周，应该系大二，所以唔关六四事
|
| 47. yyfan2015-12-09 12:20:47 |
|
SUGAR SIS
系啊，我地果时被人叫二流子，暨大叫假洋鬼子，华农土包子，中山医书呆子
|
| 48. Sugar2015-12-09 12:28:09 |
|
Fan 老闆: 咁你上次甩底損失真係大!!! 原本可以同引刀兄暢談往事....你哥兒倆肯定共聚同醉,千杯少!!! 哈哈哈! 我嘅 second degree 讀法律,不過响北京~~~
|
| 49. 向饭民说不2015-12-09 12:31:38 |
|
我绝对支持中港融合，同送子女出国留学有咩冲突。眼睛看远一点。
而支持中港融合，事实本人是属于大香港主义者。现在中港融合，是香港兼并深圳。港璨自闭青年不会明白。从来要兼并他人领土，都系要用鲜血才能换回来。
见你甘回应，证明阁下真系典型的自闭青年。事实上小孩在外国都发现香港学生根本非常自我封闭。反而大陆学生开放很多。 |
| 50. 向饭民说不2015-12-09 12:35:32 |
|
45楼，又是属于假中立的黄尸。讲开香港人抹黑大陆，今日各大媒体都大肆报道， 太陽報A1：廣州女大生援交風 引爆愛滋
好像是发现新大陆一样。而事实是，援交之风日本有，香港有，台湾有，全世界都有。
这就是假中立废材利用负能量破坏社会安定的方法。 |
| 51. yyfan2015-12-09 12:37:22 |
|
SUGAR SIS
所以我下次聚会已向ronald申请参加
我有同学衣家系广州做律师，1st degree是中医，六四系学运领袖之一，他的经历也是传奇，有机会你地应该倾下
|
| 52. Sugar2015-12-09 12:45:07 |
|
Fan老闆: 世界真細小.......說來話也長! 好的,在這裡三言兩語難述當年起伏跌宕,有機會再詳談吧!
|
| 53. 望東樓2015-12-09 12:54:18 |
|
刀兄，我無資格成為北大人，只係職場相遇。 |
| 54. 向饭民说不2015-12-09 12:56:40 |
|
讲开64，当年的死亡人数分分钟比最近法国空袭死亡人数小。
我地一直都被亲西方媒体抹黑到以为当年真系死了很多人。是一场屠杀。
但是如果是屠杀，点会得几个天安门母亲。如果是屠杀，点解没有任何证据。当年亲西方的力量可以安排那些领袖离开大陆，但是点解就是没有带证据离开。 |
| 55. yyfan2015-12-09 13:20:53 |
|
飯民兄講得冇錯，廣場確實冇死人，學生永遠是政治鬥爭的犧牲品，作為當時參與者，我地只是希望給當年的學生一個平凡，佢地大部分冇意推翻政府
事實上認識的同輩已經不想再提，六四留下給我地嘅也只是一段回憶 |
| 56. To 向飯2015-12-09 13:27:06 |
|
如中國美好，那建制子女應留學中國，旅遊多去中國內地。如果大人不以身作則，下一代只會同中國越行越遠 |
| 57. 新抱仔2015-12-09 13:29:06 |
|
89年我那時是小學生，都想知發生什麼事？只知爺爺好像哭了。 |
| 58. 向饭民说不2015-12-09 13:47:19 |
|
56楼，都话你自闭。你这样的思维只会令自己失去竞争力。
今日大陆西方学生来中国留学，同时很多中国人出国留学，非常正常的行为。 |
| 59. Joe2015-12-09 14:01:41 |
|
|
| 60. 向饭民说不2015-12-09 14:08:52 |
|
楼上，不过我就不明白点解引刀充满负能量。或者是今日毒媒日日放毒，令好多人不自觉地被洗脑。以为天就来跌下来。
事实是香港比较其他地方，这几年发展其实是比较好的。 |
| 61. middle middle class2015-12-09 14:22:28 |
|
引刀兄，乜咁有興緻出文呀？ 近期咁多位師兄師姐出文，好不熱鬧，亦是我等申手牌網友之褔。 你呢個中國通，得閒爆多少少經濟料…
Anyway，熱奇切祈待！ |
| 62. To 向飯2015-12-09 16:07:29 |
|
那有西方鬼佬來中國讀書? |
| 63. 向饭民说不2015-12-09 16:41:17 |
|
|
| 64. 麗娜2015-12-09 16:48:58 |
|
引刀兄，小妹感受到你當時的奮鬥，是不容易啊，普通話應該那時不懂吧？要適應國內的生活，特別是那時還未很先進，真的很有勇氣。那時可能去台灣升學受歡迎D。 |
| 65. 引刀一快2015-12-09 16:54:39 |
|
一覺醒來，感激大家關注，倒序囬覆。
To 62樓兄台
西方鬼佬來華學習，多得很呢！
我就講講近20年來華留學生變化趨勢，當然，係粗略嘅。
20年前，留學生最多就係日本，後來可能因爲中國經濟崛起，韓國來華學習人數激增，反而日本人减少，到咗2000年開始，非裔人數開始越來越多，同時，東歐學生亦越來越多，不過東歐來華多數女士，美加、澳紐等“西方鬼佬”，個人觀察係2005之後增長比較快，相對少見係拉丁裔。 |
| 66. 引刀一快2015-12-09 17:02:17 |
|
To 64樓 麗娜女士
妳真係心水清！我當時唔識普通話，雖然以前讀過蘇浙嘅“國語”教學，其實祇係臺灣老師佢有佢講，學生唔識聼！但係因爲係香港人，同房有廣東人幫忙，講真，普通話唔係“學”返嚟，而係“講”返嚟嘅。
當年嘅難適應嘅地方，我會另外寫，睇下可唔可以啓發下D年青人。 |
| 67. 引刀一快2015-12-09 17:05:15 |
|
To 61樓 middle middle class兄
引刀出文係因爲又輸咗舖大嘅！你問打工仔就知道架喇。
經濟料我一定會中肯報導，保證唔會道聽途說。 |
| 68. 引刀一快2015-12-09 17:06:50 |
|
To 59樓 Joe兄
慢慢睇，你會發現引刀都有正能量。 |
| 69. 歷史長河2015-12-09 17:07:57 |
|
刀兄，你冇辜負'傳奇'個稱號。加油！ |
| 70. 引刀一快2015-12-09 17:13:40 |
|
To 56樓兄台
出國留學唔係背弃民族，最緊要係學咗嘢識得攞返自己國家做貢獻。
|
| 71. 引刀一快2015-12-09 17:24:29 |
|
To 47、55樓 yyfan兄
你係“二流子”？華師就自稱“莘莘學子”！
當年89嘅事件，有唔少人借機上位，當年你知道晚上11點宿舍關燈喇，我學院有個師兄，半夜走去搵路燈借光寫“報告”，日日將同學、師兄弟嘅言行上報，結果因爲“有功”撈咗個輔導員職位，中國搞得唔好，同呢種選拔風氣好大關係。 |
| 72. 打工仔 Andy2015-12-09 17:30:22 |
|
|
| 73. 引刀一快2015-12-09 17:35:06 |
|
To 69樓 長河san
互勉互勉！話我傳奇定係話我踹氣先？
其實，立足社會唔容易，每個人嘅故事，都傳奇。
|
| 74. 引刀一快2015-12-09 17:37:00 |
|
|
| 75. Sammy2015-12-09 17:43:33 |
|
|
| 76. yyfan2015-12-09 17:51:11 |
|
刀兄
講起輔導員就把幾火，我地果個本來一直企係學生果邊直至所謂勝利大游行，點知後來秋後算帳佢可以當自己是旁觀者去指責我地
廈門人潔地靈，是當年入山必經之路，你係廈大定集美？ |
| 77. 歷史長河2015-12-09 19:40:30 |
|
刀兄，Fan 兄，我個經歷同你地都有相似之處，只不過是交叉換位，你來我往。哈哈，有機會大家交叉感染一下！ |
| 78. Oscar Lam2015-12-09 21:16:55 |
|
引刀兄的學生年代與眾不同，期待你的下一篇文章。 |
| 79. To 向飯2015-12-09 21:42:25 |
|
你唔我用意，我實在見了很多自稱建制父母，D子女亦變了黃色，如果政府不再做野，建制成年人唔能夠帶領年青人認識祖國，最後香港亦變成敍利亞 |
| 80. Joe2015-12-09 23:08:08 |
|
To 60/F
飯兄，刀兄不是獨孤一味負能量的，就不防等待其正能量的一面吧....
|
| 81. To 引刀2015-12-09 23:16:10 |
|
人仔又應跌幾多?謝 |
| 82. 向饭民说不2015-12-10 00:34:49 |
|
引刀你吾系輸死蠢，你系輸做人太負面。你系大陸完成大學課程，但是卻miss了大陸經濟增長的20幾年。
但是你不但不檢討自己，還要怪大陸黑暗。這就是時下香港班廢青的寫照。完全缺乏競爭力。 |
| 83. 自我陶醉2015-12-10 00:39:19 |
|
向飯兄、Joe 兄，
正如law student兄說，所謂正能量，就是用積極正面態度，面對人生各式各樣的挑戰。
對市場走向好壞的判斷，是各人以自己認知對未來大方向的估算，用的是判斷力和分析力，根本與什麼正能量、負能量拉不上任何關係。如果看淡就是負能量的話， 那麼分析員是否再也不用分析數據呢？ 只要全部看升，永遠看升，人云亦云便可以了，對嗎？ 這就是各位心目中的正能量嗎？ 這樣真的是客觀分析嗎？
根本就是胡說八道，混淆是非。 |
| 84. 向饭民说不2015-12-10 00:40:46 |
|
81樓，全世界都跌，人仔吾跌是很難的。好多廢材好希望人仔跌，等他們可以回去20年前反大陸做大爺的尊嚴。
不過如果大陸人仔跌，香港經濟一定無運行。當年董伯伯講過，大陸好，香港好，他沒有說，大陸差，香港死得更快。
最近樓價跌，就是人仔貶值trigger的。人仔未貶值時，樓價站的幾硬，廢青以為樓價，就可以買到樓，問題當經濟差的時候，廢青要擔心的是自己的工作。 |
| 85. 朗晴2015-12-10 00:47:08 |
|
|
| 86. 引刀一快2015-12-10 06:24:12 |
|
|
| 87. 引刀一快2015-12-10 06:32:41 |
|
自我陶醉兄
你講中咗我一直冇表達好嘅理念，精準清晰。
|
| 88. 引刀一快2015-12-10 07:30:58 |
|
|
| 89. 引刀一快2015-12-10 07:34:17 |
|
To 76樓 yyfan兄
廈大、集美兩間我都去過，兩間喺大陸高校嚟講都係超靚，好有校園味。
不過我係廣州，唔係果邊喎。 |
| 90. 引刀一快2015-12-10 07:36:09 |
|
|
| 91. 引刀一快2015-12-10 07:37:29 |
|
To 78樓 Oscar Lam兄
引刀與衆不同，和你一樣。 |
| 92. 引刀一快2015-12-10 07:40:17 |
|
|
| 93. 向饭民说不2015-12-10 10:06:48 |
|
自我陶醉，要自欺欺人，无人可以改变，但是网上很多散布负能量的写手，肯定就有政治原因。回归之前，大家一样生活，一样的面对高楼价，面对高通胀，但是当时人人都开心。今日，其实无乜变，但是就是因为毒媒日日播毒，发放负能量信息。真系以为天就来跌下来。其实香港比较其他地方，发展还是好的，比较废青喜欢的台湾，日本，其实更加好。
真正胡說八道，混淆是非的就是这些假中立的负能量losser。 |
| 94. yyfan2015-12-10 10:17:00 |
|
刀兄
冇諗到廣州除咗暨大外仲有其它學校招收港澳生，雖然離開廣州十幾年，但每次返去都會有好多回憶，所以大陸總部都會放係果度，曾經幾次想搬去深圳以方便上落
長河兄所言交㕚何解？ |
| 95. 自我陶醉2015-12-10 11:06:30 |
|
93樓 向飯兄，
政治永遠都係黑暗嘅，全世界有邊度唔係？ 所以我從來都冇興趣討論。
咩論點都好，冇市場點會有人在意？ 咁點解以前嘅論點冇市場，依家有呢？ 物先腐而後虫生，所謂的飯民，所謂的廢青，都只是應運而生，其他不作討論了。
同台灣、日本比算好，就心滿意足，這就是正能量嗎？ 同南韓、星加坡比又如何， 小弟認為只有不斷與強者相比，力求上進，才是真正的正能量，只與losers比的人，永遠都只會是loser。 |
| 96. 向飯民說不2015-12-10 11:44:43 |
|
樓上，你又系度玩假中立，回歸以來，我地見到一些假中立的傳媒不斷的顛覆是非，抹黑。還有咩都賴政府。總之咩都系政府的錯。 你就無興趣政治，但是卻系度玩政治。不要當人傻啦。 |
| 97. 向飯民說不2015-12-10 11:44:45 |
|
樓上，你又系度玩假中立，回歸以來，我地見到一些假中立的傳媒不斷的顛覆是非，抹黑。還有咩都賴政府。總之咩都系政府的錯。 你就無興趣政治，但是卻系度玩政治。不要當人傻啦。 |
| 98. 向饭民说不2015-12-10 12:08:48 |
|
还有一个和强者比较多人，正常都系好正能量吧。
不过现在很多崇美L，又真系好难讲，呵呵。 |
| 99. 引刀一快2015-12-10 12:14:25 |
|
|
| 100. 引刀一快2015-12-10 12:23:21 |
|
To 94樓 yyfan兄
唷，全國聯招，包括兄台母校呢！以前聯招同僑校係分開在港招生，分開考試，依傢有冇合并我就唔清楚。
長河san係捉狹鬼，我以前講過大陸人港人觀念習慣交叉感染，佢攞嚟講笑啫。 |
| 101. 引刀一快2015-12-10 12:31:05 |
|
自我陶醉兄
向飯呢種睇法，就係表達緊一種極端思想，時而左，時而右，冇絕對派系，但係對好多事物都用上極端睇法。 |
| 102. 自我陶醉2015-12-10 12:38:16 |
|
引刀兄，
我估佢只係借題發揮，表達對現今政治環境的不滿，又或者是對抺黑現政府的勢力的一種積極回應，呵呵！ |
| 103. 引刀一快2015-12-10 13:29:51 |
|
|
| 104. 引刀一快2015-12-10 13:50:29 |
|
To 94樓 yyfan兄
本科四年可能係人生中最深刻嘅四年，期間個人嘅思維、能力快速成長，參與人格形成，舉足輕重。而且廣州文化沉澱遠比深圳深厚，好多喺廣州讀過書嘅人，都好留戀。 |
| 105. 向飯民說不2015-12-10 14:56:57 |
|
樓上，又系度玩假中立，假客觀，現在香港的所有申請，甚至系tsa，都非常政治化。 還有，政治經濟是分不開的。 我都被港大的民意調查騙了很多年。港大民意調查應該系好客觀，好中立啦，原來是騙人的。 |
| 106. 引刀一快2015-12-10 20:43:39 |
|
向飯
係咪淨係你嘅睇法先至係真中立，真客觀？
數據要客觀，好容易，只要不保留地公開取得數據手法，大家清楚數據由來，咁就相對地客觀。 |
| 107. 歷史長河2015-12-10 21:11:24 |
|
刀兄，調查問卷的設計大有學問，同樣的問題點問則可以基本決定結果。試想下面一個問題，不同問法去問同一個人很可能得到不同答案：
1. 樓市有周期，樓市已升足13年，您認為樓市還會再升嗎？ 2. 長升路上有波幅，樓市已從高位調整將近5%，您認為樓市還會再跌嗎？ |
| 108. 引刀一快2015-12-10 21:35:36 |
|
長河san
呢個關鍵就係訪問對象是否有自身看法，和怎樣的應對態度。
問一個外行的，根本從未考慮和接觸樓市嘅人，係好容易作出答案導引，所以問卷應該公開，睇數據嘅人同時知道提問方式，從而判斷對數據嘅采納程度。 然而，應對態度牽涉嘅問題太廣太深，有人順德人，有人包詏頸，提問者氣場强大，或者美艷動人，配合正面導引形式嘅問題，如果再針對氣場弱小人群選對象，的確可以左右數據。 |
| 109. 向飯民說不2015-12-11 11:21:46 |
|
引刀，我就好有立場，我是屬於大香港主義者，所以就好痛恨那些負能量，不思進期，自閉而等運到的廢材。同時我又相信香港有境外組織不斷播毒，目的就是搞亂中國，搞亂香港，這違背了大香港的主義。 還有，長毛霸公屋，證明公屋政策，其實人民公社，根本是有問題的。 |
| 110. 引刀一快2015-12-12 00:52:55 |
|
向飯
我同你唔同，我係大中華主義，總之國家民族係大前提，我以前唔明你點解成日話我負能量，依家明晒！原來你係大香港主義者，你眼光就俾香港呢塊彈丸之地局限咗！
眼光拉闊D，睇睇咩叫鞭策，咩叫溺愛。 |
| 111. yyfan2015-12-12 08:20:51 |
|
刀兄
以你的觀察，大陸依家咁嘅狀況，共產黨救唔救到？我就覺得敗也共產黨，成也會是共產黨 |
| 112. Scoliosis2015-12-12 09:07:58 |
|
2日冇睇就甘熱鬧，Thumbs up! 正能量終於回歸呢個blog,我小出聲都忍唔住出來同大家打招呼！ |
| 113. 引刀一快2015-12-12 17:32:53 |
|
To 111樓 yyfan兄
你我都係長枕大陸嘅人，不過可能着眼點有所不同，個人睇法，要救，唔會少於5-6年，如果係冇高瞻遠矚而夾硬急救，改革開放以來累積嘅成果會冇晒。 |
| 114. 引刀一快2015-12-12 17:34:06 |
|
To 112樓 Scoliosis兄
稀客，請多多交流！ |
| 115. yyfan2015-12-12 22:01:25 |
|
刀兄
好在你話仲有得救，事實習近平嘅上任可能真是可以扭轉咁多年積落嘅問題，否則再來一對胡溫則是死路一條 |
| 116. 向饭民说不2015-12-12 23:04:03 |
|
引刀这些所谓的大中华主义者，似乎只是想透过革命推翻现政府。然后建立一个所谓的普选的政府，以为只有民主，中国就会强大。
因刀可能是真正的爱国者，但是在目前同引刀一样的想法的不同势力，包括了饭民背后的金主。
因刀可能又是一个理想主义者，真系以为推翻中共，就可以救中国，但是事实是如果中国今日发生革命，中国被境外势力，分裂的机会是非常大的。到时西藏独立，新疆独立，台湾独立等等。因刀的大中华理想又点达到。
64，幸亏当时邓小平打败了境外势力搞的颜色革命，否则，中国人又要过着水深火热的生活。
今日中国有10亿人口，means that，中国的物流运输一旦出现问题，成个中国人的生活肯定成问题，而香港人一样会有很大问题，真系生灵涂炭。 |
| 117. 引刀一快2015-12-13 04:14:24 |
|
116樓 向飯民說不
引刀從來沒有任何顛覆中國政府之行為或構想，亦從未在任何媒體上表達反政府言論。
喂，向飯，你講嘢有冇經大腦架？ |
| 118. yyfan2015-12-13 08:05:22 |
|
向飯
引刀只係道出大陸問題，字裡行間都見唔到任何反政府的痕跡，可能你想多左？
|
| 119. 自我陶醉2015-12-13 08:11:56 |
|
向飯兄，
說話真係唔可以隨意亂講，刀兄日日都身在大陸，亂扣帽子會害到人! |
| 120. 無奈2015-12-13 11:08:24 |
|
遲來的恭喜，刀兄傳奇果然非同凡響，逆向思維需有勇氣，尤其是甘與大陸生為朋足顯遠見，易建構人際關係。👍 |
| 121. 長期糧尾2015-12-14 01:19:00 |
|
116 向飯 你並非本土香港人，你才是極端主義，非友即敵。 滿腦子強國人思維。 |
|
|
|
|
