打房政策展開前，香港 D 大型屋苑每年的轉手率有7~8%，粗略估計賣家沽貨原因如下:
楼換楼……可能兩房換三房改善居住環境，亦有可能三房家庭因子女長大成人，玩一開二，呢D客佔幾成成交，乃重要二手盤源。
專業炒家……通常係「老街坊」，對屋苑的行情瞭如指掌，所以佢哋好多時都做到高沽低吸，因到價即沽係地代至愛。
「醒目」租住等……他們可能通過沙盤推演、求神問卜、超級電腦運算，從而得知後市「大事不妙」，因此佢地就先行沽出自住再候低位回補，呢班「醒目仔」都佔成交唔少。
長線投資者調整資產配置……他們有時買股、有時買楼收租、見勢色唔對可能存定期，玩逢三退一。
財困戶……可能因投資失利、健康惡化、失業減薪而急放，經濟好都間唔中有幾%，市道唔好更多，但可遇不可求。
境外人士……因為回鄉退休、賺夠、睇淡……總之賣屋賣田連根拔起，但呢度佔成交不多。
但在打房政策全面開展後，香港D大型屋苑每年的轉手率跌到只有 3~4 %，粗略估計呢家死剩的賣家沽貨原因如下:
楼換楼……因為換楼難度比以前倍增，因此不少賣家採取一動不如一靜方案，但呢D客仲係主流，隨時佔一半成交，還是重要二手盤源。
專業炒家……呢班人不少已經金盤洗手，加上一厘按息神功護體，呢家轉晒做長線收租人士。
「醒目」租住等……呢班「醒目仔」在對上 5~6 年前仆後繼，已經將應該要沽嘅貨，走得八八九九，呢家幸存自住客見別人沽自住死得咁惨烈，而自己間嘢每月供楼支出又所費無幾，地代想再震佢哋倉的難度倍增。
長線投資者調整資產配置……這一年香港無論股市、期市、汇市及商品，無不大起大落，照小弟認識的友人為例，唔輸到裙拉褲甩者，已經叫高手，要是磚頭投資者呢家槓桿不多，現金流仲係正数，咁佢哋大多已買定花生、揸定現金在睇戲，等執死雞。
財困戶……呢排市道唔好，加上傳媒集體看淡，呢類成交真的多咗，劈價盤由此而來。
境外人士……因為炒燶A股、生意失敗、資金鏈斷裂，無可否認呢D成多亦多咗。
呢兩叁個月，上述各項因素夾夾埋埋，出來的現象係:
「你被迫急放，因為無專業投資者同你接貨，唔好彩的話，會被準買家打完心口、再被地代打背脊；但你若要急買的話，因為無乜堅賣市價盤，可能要追價。」
總之呢家邊個急，就邊個要跌錢，市場因此呈現兩極化。
